РУСКИ КЕРЕСТУР – Вчера вечар Здуженє женох „Байка”, вєдно з Клубом старих и пензионерох, у просторийох Клубу у Доме борцох и пензионерох у Руским Керестуре орґанизовали приємне друженє з нагоди 8. марца – Медзинародного дня женох.
З тей нагоди жени з „Байки” пририхтали виставу тканих роботох, на хторей були виложени давни партки, ручнїки и хлєбовки анономних женох-ткачкох, а тиж и терашнї роботи членїцох „Байки” – тепихи, шали и керпари.
Красне число присутних, найвецей жени, у мено орґанизаторох привитала предсидателька „Байки” Славица Катона, а Амалия Гарди пречитала пригодни текст „Руски парток”, новинара „Руского слова” Дюру Виная.
На програми були и госци з Коцура, у мено Етно-клубу „Одняте од забуца”, так же Силво Горняк виведол монодраму „Я бувши” Серафини Медєши, у режиї Дюру Макая, а як суфлерка му помагала Аранка Медєши.
З нагоди 8. марца, „Байка” вчера, нєшка и на ютре на штанду у центре Керестура предава виробки своїх членїцох.
