БЕОҐРАД – Система Амбер Алер, „Пренайдз ме”, хтора служи за нагле обвисцованє явносци у случайох кед нєстанє дзецко, официйно пущена до роботи у Сербиї.
У случаю активованя системи о тим же нєстала малолїтна особа гражданє буду обвисцени зоз СМС порученьом, претаргнуцом телевизийних и радио емисийох, на кайронох на авто драги, на аеродромох, автобусних и желєзнїцких станїцох.
Тота система поможе же би ше швидше ришело случай кед нєстанє дзецко, кед кажда минута драгоцина.
Кед ше прияви же дзецко нєстало, полиция преценї и одлучи чи ше активує систему, окрем кед ше система активує автоматски, а то кед нєстале дзецко животно загрожене, кед нєстало дзецко младше як седем роки, кед нєстало дзецко зоз инвалидитетом до 18 роки.
До обвисцованя уключени медиї, вони буду претарговац емитованє порядней програми зоз фотоґрафию нєсталого дзецка и зоз податками як цо то место дзе є остатнїраз видзене. Тиж и мобилни оператере буду посилац таки порученя. Порученя буду емитовани на кайронох на авто драги, аеродромох, автобусних и желєзнїцких станїцох.
У тей першей фази найважнєйшу улогу буду мац медиї, мобилни оператере, „Драги Сербиї”, Аеродром „Никола Тесла”, автобусни и желєзнїцки станїци.
Планує ше и другу фазу кед буду у обвисцованю участвовац тарґовински центри, дружтвени мрежи и бензински пумпи.
