РУСКИ КЕРЕСТУР – Духовни живот у парохиї св. оца Миколая у Руским Керестуре бул богати и творчи, алє даєдни подїї заш лєм треба видвоїц визначел у своєй казанї 1. януара парох керестурски о. Владислав Варґа.
Того лєта у святилїщу Водици означена 200 рочнїца од другого зявеня Пречистей Дїви Мариї, подїя котра значна за духовни живот нє лєм Керестурцом, алє и шицким вирним нашей Епархиї. У тим святилїщу шестри Служебнїци СНМД означели свой ювилей, 130 роки од снованя свойого чину односно заєднїци и 75 роки од снованя провинциї св. Осифа у Сербиї. Предлужени роботи на комплетованю документациї за проєкт „Емаус”, Марийов дом котри ше того, 2023. року конєчно почнє будовац.
Стретнуце Руху фоклоару зоз целей Сербиї, котре мало и медзинародни характер, збуло ше 3. децембра праве у Руским Керестуре и то було перше таке стретнуце у парохиї.
Ище єден роботнїк у Божей винїци, о. Ярослав Варґа котри пошвецени за священїка 6. децембра на швето св. Миколая архиепископа чудотворца започал свою службу у керестурскей парохиї, дзе го за священїка пошвецел кир Георгий Джуджар.
По податкох з матрикулох прешлого року у керестурскей парохиї св. оца Миколая повинчана 22 пара, покресцени 45-еро дзеци, а умарли 79 особи.
У парохиї св. Йосафата у Кули число парохиянох 1.217, покресцени 9 дзеци, а число умартих 37, док винчаних нє було.