РУСКИ КЕРЕСТУР – У велькей виронаучней сали вчера пред поладньом отримани успишни традицийни гуманитарни Крачунски вашар, мал вецей як 37 викладачох, а було вельо и нащивительох и купцох.
Спред орґанизатора, по словох координаторки Вашару, волонтерки Каритасу, Ясмини Надьовей, то по тераз найвецей викладачох, а окрем з Керестура були и з Коцура, Кули, Равного Села, Нового Саду и першираз зоз Лалитю. Предавало ше рижнородни крачунски и други прикраски ручно виробени, колачи, бобальки, меду, маку итд.
Вашар потримує креативцох аматерох рижних ґенерацийох, а тиж ма и гуманитарни характер бо ше на нїм зберало и добродзечни прилог за крачунске єдзенє фамелийом у потреби у керестурскей парохиї. Добродзечни прилог назберани коло 15.000 динари.
Паралелно тирвала и акция збераня помоци за дзеци у Притульним доме (Свратиште) у Новим Садзе та їм назберане вельо облєчива, средства за гиґиєну и инше, у чим ше велї Керестурци одволали.
