РУСКИ КЕРЕСТУР – Стреду, 7. децембра у 8а класи керестурскей школи, на годзини руского язика професорка Тамара Хома, зоз школярами отримала годзину на чесц нашому линґвистови Миколови Кочишови а у рамикох манифестациї „Днї Миколи М. Кочиша”.
На годзини були присутни представительки Дружтва за руски язик, литературу и културу Ирина Папуґа и Мария Надь хтори школяром подзелєли кнїжки „Руска ґимназия” авторки Ирини Папуґа. Була то нагода же би школяре бешедовали о нашому линґвистови и о єдиней рускей ґимназиї по руски на швеце. Намира на тей годзини и була же би ше афирмативно бешедовало о школованю на руским язику у нашей ґимназиї.
Представителє Дружтва за руски язик, литературу и културу, штварток 8. децембра двоязичну кнїжку по руски и сербски „Руска ґимназия” придали до управи Ґимназиї „Жарко Зренянин” у Вербаше. Од 1970. до 1977. року керестурска ґимназия була видвоєне оддзелєнє вербаскей ґимназиї, та прето треба же би кнїжку мала и ґимназия у Вербаше.
