КОЦУР – На площи опрез Основней школи „Братство єдинство” зоз покладаньом венцох на памятнїк погинутим борцом „Слунко шлєбоди” Месна орґанизация Здруженя борцох НОВ у Коцуре означела Дзень ошлєбодзеня у Другей шветовей войни. Зоз тим указана чесц шицким погинутим борцом, як у Другей шветовей войни, так и у войнох котри ше збули дзеведзешатих рокох.
Присутних привитала предсидателька Месней орґанизациї здруженя борцох НОВ Мария Дудаш Фейсa, а потим венци на памятнїк положели представителє Општини Вербас, представителє Општинскей орґанизациї СУБНОВ Вербас, представнїки Месней заєднїци Коцур, представителє Сербскей напредней странки, представителє Социялистичней партиї Сербиї, представнїки Основней школи „Братство єдинство”, представнїки Активу женох КУД „Жатва” Коцур и представнїки Месного одбору СУБНОВ Коцур.
Пригодну бешеду знагоди означованя Дня ошлєбодзеня отримал Микола Шанта, а Мария Горняк пречитала пригодни текст у хторим надпомнуте же нє шмеме забуц гевтих котри зложели свой живот у нєщесцох котри воламе войни. Пречитани и мена шицких погинутих борцох котри, як визначене, зложели свойо животи у войни за нашу лєпшу будучносц, а зоз минуту цихосци им дата чесц. Як знак здогадованя на нїх, оглашела ше и огньогасна сирена.
На концу програми школярки Основней школи „Братство єдинство” Рамона Будински и Даниєла Ґайдош гуторели стихи пошвецени Дню ошлєбодзеня, а пририхтала их наставнїца руского язика Снежана Шанта.
На памятнїку котри ше находзи на площи опрез Основней школи у центру Коцура виписани мена шицких 55 борцох котри страдали у Другей шветовей войни, як и мена трох борцох котри страдали у войнових зраженьох дзеведзешатих рокох на териториї бувшей Югославиї.
