УКРАЇНА ‒ Українска грекокатолїцка Церква у України 1. септембра 2023. року преходзи на нови стил за нєрухоми швета з очуваньом важацей Пасхалиї. Тото виявел отец и поглавар УГКЦ Блаженєйши Святослав у директним преносу „Живей телевизиї”, сообщуюци одлуку Архиєрейского синоду УГКЦ у України у вязи зоз календарну реформу.
„Маюци на уваги числени вимоги вирних и понеже окончени предходни консултациї зоз духовенством и монашеством нашей Церкви о дозретей потреби реформи Литурґийного календара УГКЦ у України, а тиж и операюци ше на душпастирски рациї: УГКЦ у України преходзи од 1. септембра по новим стилу (початок Индикту) 2023. року Господнього на нови стил за нєрухоми швета зоз очуваньом важацей Пасхалиї” ‒ гутори ше у 1. точки 5. Заключеня 93. Сесиї Архиєрейского синоду УГКЦ у України, котра ше одбула 1-2 фебруара 2023. у Львове-Брюховичох.
У складзе зоз тоту одлуку, уж од 1. септембра того року шицки нєрухоми швета УГКЦ у України будзе ше швециц по новим стилу. Окреме Рождество Христово – 25. децембра, Богоявлeнє – 6. януара, Благовищенє у Пресвятей Богородици – 25. марца, Покрови Пресвятей Богородици – 1. октобра, святого Миколая – 6. децембра итд.