РУСКИ КЕРЕСТУР – У орґанизациї Фодбалского клуба „Русин”, всоботу 18. януара у ресторану Бостон отримани ювилейни 15. Русинов бал.
Предсидатель ФК „Русин” Желько Орос зоз пригоднима словами привитал госцох и отворел традицийни и ювилейни 15. Русинов бал, а потим додзелєни припознаня и подзекованя. За найлєпшого бавяча преглашени Стефан Тома, потим за найлєпшого и найгласнєйшого навияча припознанє достал Златко Рац Мишка, док за навиячох хтори прешли найдлукгшу драгу же би сцигли на бал припознанє достали Себастиян Няради Себо и Борис Орос, хтори пришли зоз Словацкей.



Окремне припознанє того вечара, од управи клуба, достал предсидатель ФК „Русин” Желько Орос за його закладанє, потримовку и роботу у клубу а то бул зарамиковани ґолмански дрес з його меном.
Ювилейни 15. Русинов бал угосцел коло 180 особи, а за таку нащивеносц и добру атмосферу як и прешлого року бул задлужени „Еуро Бенд”.


На тогорочним балу подзелєни и 300 томболи у вредносци коло 4.000 евра, за хтори ше постарали орґанизаторе и числени спонзоре и привреднїки. Перши три главни награди були – Резорт и спа „Фрушке Терме” хтори подаровал ФК „Русин”, потим три ноцованя на Златибору подаровал Славко Ґовля – „Амбиєнт ҐС”, док треца награда бул мебель, а подаровал Мебель „Мая”.
Шицки три главни награди хтори вицагнути на томболи остали у Руским Керестуре.
Орґанизатор ювилейного 15. Русинового балу бул Фодбалски клуб „Русин”.
