Кед и у пензиї нєт часу

автор С. Фейса
164 Опатрене

Папуґово родом з Дюрдьова, алє одкеди пошли з валалу до варошу до школи, у нїм остали и жиц. Там и робели, а кед попристановяли дзеци, кед пришол час же нє мушели ставац на роботу, вше частейше ше врацали на валал.

Кед ше пред 17 роками у Папуґовей фамелиї народзел їх перши унук, Любица пошла до пензиї. Цали свой роботни вик робела у просвити як наставнїца хемиї, у Ветернику, а вец у новосадскей ОШ „Петефи Шандор”. Цешела ше кед праве єй школяре достали найвисши припознаня з того предмету на републичних змаганьох, з єдним словом, свою роботу нїґда нє одрабяла и барз ю любела.

Владимир, по фаху инжинєр технолоґиї, перши трицец роки бул технїчни директор у „Ароми” у Футоґу, а остатнї дзешец пред пензию робел у приватней фирми, тиж на руководзацим месце. Пред 12 роками ше и вон пензионовал.

Кед ше закончело бешеду о найкрасших хвилькох, о успихох и задовольству хторе мали док були заняти, тема о вельо вецей часу и єдней файти оддиху ше ми видзела як лоґични шлїд нашей дальшей розгварки. Док нє почали приповедац.

Озбильна робота

Владимир уж пейц роки роби на родослове своєй фамелиї. Його супруга гвари же ше то после одняло од контроли, та ше лапел и до других фамелийох, но заш лєм, найважнєйше му тото же дошол до своїх предкох, до першого Дюри хтори як покойни перши записани и у матрикулних кнїжкох же умар 1893. року.

Видно же Владимир тото роби з любову, педантно, преверює з даскелїх жридлох, з даскелїх кнїжкох.

– Мойо шицки з Дюрдьова, а предки з Руского Керестура, та сом нашол податки же перши Дюра Папуґа хтори крочел на керестурску жем пришол у першей габи 1751. року, кед мал 40 роки. Мал теди трох синох, єдну краву и єдного коня, а умар кед мал 51. рок. Од нього шицко почало – гвари Владимир надпоминаюци же му найбаржей у тей роботи помогли Йовґен Мудри и Саша Сабадош, односно диґитализовани податки з керестурскей парохиї, алє и кнїжки Мирона Жироша, як и Радована Сремца.

– Велька то робота, а барз ми важне же би податки були точни. То годзини и годзини препровадзени у читаню, дешифрованю рукописох, поровнованю… Твердзим же тото мож робиц лєм у пензиї и кед жена то допущи – гвари з ошмихом Владимир хтори би, по шицким судзаци, могол буц барз добри сотруднїк историчаром, новинаром, або виглєдовачом нашей прешлосци.

Кед слово о родослове, супруга Любица нє ма нїч процив, и єй коренї Владимир попренаходзел, записал, архивовал, и додава же тото же су обидвойо у пензиї нє значи же маю вельо вецей часу. Напроцив, вше дацо конча, робя и вше су по цали дзень завжати

– Маме двох унукох, Николу и Владимира у першей и другей класи ґимназиї, и два мали унучки Инес и Исидору. Вше кед требало, були зме на помоци, а так и нєшка. Правда, унучки ище мали, треба з нїма байлаґовац, маю енерґиї за даскельо баби, алє барз любиме кед приду, окреме кед правим з нїма колачи, або кед приду ґу нам на валал, до Дюрдьова – гвари вона.

Пол рока вше на валалє

У Дюрдьове Владимир нашлїдзел хижу од родичох, та су з Любицу роками, од мая по октобер, на валалє. Там маю овоци през цали рок, там и винїца, заграда зоз желєняву, а двор полни з нєкаждодньовим и еґзотичним квецом. Треба коло того шицкого робиц.

– Владова робота орезац громаду ружи, но то нє так дзечнє роби, алє ужива у своєй роботи коло винїци, алє и иншим. А нє да виняц тоту стару ягоду на стред двора, бо вона там од 1892. року. У пречнїку ма метер и пол, и барз вельо зродзи кажди рок. Ми нє печеме палєнки з ягоди, та нє любим же нам цапкаю по цалим дворе, алє так озда муши буц. Маме и кайси, и попри познатих овоцох маме стебла каки яблука, сибирского лимуна, урми и смокви. Вариме соку, маджуну, печеме паприґу… Дзеци ше дакеди чудую же чом ше мучим, наприклад, коло чери парадичох кед их можем купиц. А я гварим же ми то нє чежко, же то мойо задовольство, єднак так як робота коло квеца – гвари Любица хтора люби и кнїжки читац, а тиж и вишивац и геклац. Донєдавна робела и з вайцами, Владо их видул и нарисовал єй мустри з клайбасом, а вона их дзиркавела и прикрашовала.

– Кед чловек дацо з дзеку роби, вец то и нє чувствує як нє знам яку роботу и обовязку, гоч мушим припознац, робота нам нє так идзе як дакеди, уж нам ше вше частейше однїма. Алє то так, а ми нїґдзе нє понагляме. Тераз нам мило кед ше шицки посходзиме, окреме на вельки швета, кед пестуєме нашо обичаї и рихтаме нашо руски єдла, а о тим ше супруга найбаржей остара. Так то идзе, нє даремна гевта присловка же: „Жена подпера три слупи у обисце, а покус и гевтот штварти хтори ше кива” – франтує Владимир, а Любица предлужує бешедовац о дзецох и унучатох.

– Син и дзивка ше давно вишколєли, Владимир инжинєр информатики, заняти у „Ориону”, а нєвеста Ивана професорка на Природно-математичним факултету. Дзивка Мая фаховец у нуклеарней медицини, роби у Клинїчним центре, а єй супруг Саша професор на Медицинским факултету. Кажде жиє свой живот, робя и мило нам же почитую и свойо и люцке. Нашо дзеци мали и маю моцну потримовку од своїх супружнїкох, та нам унучата бешедую по руски. Хлапци ходзели и на годзини руского язика, на виронауку, знаю хто су, цо су, видно же су за тото заинтересовани.

Унучки Исидора и Инес ище мали, алє наша Мая з нїма бешедує лєм по руски. Вони знаю же за Вельку ноц обовязно рихтаме кошарочки за пошвецанє, же кед нам Миколая, а им слава, же кед у нас Крачун колядує, на столє обовязно риба на рискаши и бобальки. Так було каждого року, та и того. Преславели зме фамелиярно за столом, алє и при Крачуну з колядами. Вериме же тото нашо унучата занавше запаметаю – гваря на концу Владимир и Любица Папуґово.

У циню

Пред трома роками Папуґово з найблїзшима преславели 50 роки заєднїцкого живота. Здогадли ше на 27. новембер 1971. року, кед им на свадзбу пришол и владика Букатко хтори их и повинчал.

– Владика бул поволани як родзина, и було перше же чи придзе чи нє, а кед ше на концу дознало же приходзи, паметам як шицки бегали, и тепих ше у церкви пресцерало… И мнє рука дирґла док сом му ручнїк припинала, а видзело ше ми же ше пол валала зишло у церковней порти. Нажаль, нє пришли пре мнє, пре млоду, алє пришли видзиц владику – нашмеяла ше Любица.

ПОВЯЗАНИ ТЕКСТИ