ҐОРНЇ МИЛАНОВАЦ – Всоботу, 14. октобра у Културним центру „Мия Алексичˮ представели ше вецей як 400 учашнїки – найлєпши чуваре народней традициї. Войводину представели аматере зоз Културно уметнїцких дружтвох зоз Апатину, Панчева, Мокрину и Руского Керестура. Хлопска шпивацка ґрупа Дома култури Руски Керестур зоз квалитетним шпивацким и добре обдуманим визуалним наступом прицагла повагу явносци.
Як визначел фахови руководитель ґрупи Александер Планкош, були окреме привитани у Милановцу, як на кратким дефилеу по городзе, котрому присуствовало наисце вельке число и учашнїкох и гражданох Милановца, так и на концерту дзе им велї учашнїки винчовали на наступу.
Хлопска шпивацка ґрупа направела контакти зоз велїма особами и Дружтвами, достали уж и повланки на госцованя.
Най надпомнєме же остатнїраз на Соборе участвовала Хлопска шпивацка ґрупа Дома култури Руски Керестур, алє у другим составе, 2013 року.
Собор орґанизовал Союз аматерох Сербиї и Министерство култури котре финансийно потримало тоту манифестацию.
