Млади Русиново фодбалере освоєли турнир

автор Д. Барна
211 Опатрене

РУСКИ КЕРЕСТУР – Всоботу, 17. фебруара у спортскей гали у Руским Керестуре отримани фодбалски турнир за дзеци зоз штвартей класи, з нагоди 100-рочнїци Фодбалского клуба Русин.

На турниру участвовали три екипи, ФК Русин як домашнї, потим ФК Искра зоз Коцура и ФК Полет зоз Каравукова.

Формат турнира бул таки же кажде бавел зоз каждим, два раз по двацец минути, а за шицких учашнїкох були обезпечени златни, стриберни и бронзовo медалї.

За екипу Русина на тим турниру наступали: Давид Колошняї, Стивен Банич, Даниєл Фейди, Тони Надь, Давид Гарди, Кристофер Дудаш, Еван Медєши и Виктор Надь.

Млади фодбалере Русина зазначели шлїдуюци резултати: ФК Русин – ФК Полет 1:1. Ґол за Русин дал Кристофер Дудаш. Друге стретнуце ФК Русин – ФК Искра 3:1. На тим стретнуцу ґоли за Русин дали Давид Гарди два ґоли и Еван Медєши єден ґол. Тоти резултати младим русиновцом були достаточни же би освоєли перше место на тим турниру и достали златни медалї.

Судийове на турниру були Сани Колошняї и Мирослав Накич, а медалї подзелєл Владимир Хома.

Tурнир, з нагоди преслави 100-рочнїци, oрґанизовал Фодбалски клуб Русин.

ПОВЯЗАНИ ТЕКСТИ