БЕОҐРАД – На фестивалу „Шпиванка за Евровизию 2023”, хтори будзе отримани 1, 2. и 4. марца змагаю ше 32 композициї, а єдна з нїх и „Часова зона” („Временска зона”) новосадского бенда „Херценшлус”, у хторим грає и наша позната виолинистка Олеся Балач (Рамач).
Сербия свойого представнїка за одход на „Шпиванку Евровизиї” до Ливерпулу будзе виберац 1, 2. и 4. марца. Полуфинале фестивала будзе отримане 1. и 2. марца, финале 4. марца, а бенд „Херценшлус” наступи першого вечара полуфинала, 1. марца, под числом 12.
Музику, текст и аранжман за шпиванку „Часова зона” написал Бобан Джеверданович, а мож ю послухац на урядовим Ют’юб каналу Радио-телевизиї Сербиї, як и шицки други композициї хтори буду участвовац на „Шпиванки за Евровизию”.