11. ФЕБРУАР – На нєшкайши дзень народзени учитель, спортиста, ґлумец и режисер-аматер Евґений Медєши, а означує ше и Дзень безпечного хаснованя интернету.
1847 – Народзени америцки физичар, пренаходзач Томас Алва Едисон (Мајлан, Очайо, ЗАД, 11. фебруар 1847 – Вест Ориндж, 18. октобер 1931), хтори реґистровал вецей як тисяч патенти, уключуюци грушку зоз угльову нїтку, фоноґраф, микрофон, меґафон, фонометер. Усовершел и телеґраф и акумулатор и значно злєпшал динамо машину, пренашол кинетоскоп и перши применєл целулоидну филмску пантлїку од 35 милиметри. Направел перши филмски ателє.
1923 – У Руским Керестуре народзени Евґений Медєши (11. фебруар 1923 – 29. новембер 2008), учитель, спортски роботнїк, ґлумец и режисер-аматер. Основну школу закончел у своїм валалє, нїзшу ґимназию з малу матуру Йовґен Медєши закончел у Вараждинє, а три класи висшей ґимназиї у Заґребе и штварту класу ґимназиї з вельку матуру закончел у Ужгородзе. Уж 13. новембра 1944. року, почар робиц як учитель у основней школи у Керестуре. Єден час бул, и управитель основней школи, а робел и у тедишнєй нїзшей ґимназиї у Руским Керестуре. Учитель Йовґен Медєши робел на прекладню учебнїкох зоз сербского на руски язик. Бул рецензент велїх школских учебнїкох и автор читанки на руским язику за другу класу. Бул єден з найлєпших фодбалерох у Спортским клубе Русин у Руским Керестуре (у периодзе 1938–1956), а ґу тому бул и добри бавяч столного тенису. Режирац почал 1951. року зоз старшима ґлумцами, алє ше 1959. року опредзелєл лєм на театралну роботу зоз школскима дзецми. Остатнїраз Йовґен Медєши наступел на 25. ювилейних Майских дзецинских бавискох у Бечею 1982. року и теди му уручена памятна плакета. Достал и Майску награду Скупштини општини Кула (1969), Плакету Союзу за воспитанє и защиту дзецох Войводини (1972), Искри култури КПЗ Войводини (1974), Зарї култури КПЗ Кула (1987), Октоберску награду Месней заєднїци Руски Керестур, Орден роботи зоз стриберним венцом (1977) и Стриберну плакету АРТ Дядя за 25-рочну театралну роботу. До пензиї пошол 1984. року. Йовґен Медєши умар у Руским Керестуре 29. новембра 2008. року, а поховани є 30. новембра на керестурским теметове.
1945 – У Ялти закончена конференция вождох трох силох антигитлеровскей коалициї, на хторей совєтски лидер Йосиф Сталїн, предсидатель ЗАД Френклин Рузвелт и британски премиєр Винстон Черчил порадзели воєни плани за законченє Другей шветовей войни и одредзели нови одношеня у Европи и у швеце после войни. Троме лидере усвоєли резолуцию о „шлєбодней Европи” и порадзели ше о снованю Зєдинєних нацийох як общей медзинародней орґанизациї за мир и безпечносц у швеце.
2005 – Дзень безпечного интернету ше на инициятиву Европскей комисиї ґлобално означує з цильом промовованя безпечного и одвичательного хаснованя интернета и других диґиталних технолоґийох. Традицийно ше Дзень безпечного хаснованя интернету означує другого вовторку у фебруаре каждого року же би ше освидомело безпечнєйше и лєпше хаснованє интернету за шицких, а окреме за дзеци и младих. Дзень безпечнєйшого интернету порушани як инициятива проєкту ЕУ SafeBorders 2004, а Европска мрежа за дзвиганє свидомосци Insafe, го службено прилапела 2005. року.
