15. ФЕБРУАР – На нєшкайши дзень народзени олимпиєц Петро Файфрич и основани Дом култури Руски Керестур.
1794 – У револуционерней Французкей урядово преглашена застава Французкей.
1832 – У Беоґрадзе основана Народна библиотека Сербиї.
1942 – Народзени Петро Файфрич (Беркасово, 15. фебруар 1942. – Шабац, 11. марец 2021), спортиста, рукометаш, репрезентативец, олимпиєц, дипломовани инжинєр аґрономиї. После штреднєй школи Петро Файфрич ше уписал на Польопривредни факултет у Земуну и постава бавяч екипи РК „Младосц”, бави рукомет за вецей клуби и як член екипи Червинки освоєл титулу шампиона Югославиї. До Металопластики преходзи 1973. року хтора постава член Першей союзней лиґи Югославиї. За репрезентацию одбавел 79 стретнуца и освоєл златну медалю на Олимпийских бавискох у Минхену 1972. року, як и бронзово медалї на шветових першенствох 1970. року у Французкей и 1974. року у Восточней Нємецкей. Звонка спорту бул дипломовани инжинєр аґрономиї, и робел у польопривредней служби Општини Шабац. Року 2017. достал припознанє за животне дїло СС Шабац, а 2020. року припознанє Ключ городу Шабцу и з тим постал почесни граждан. Ношитель є националного припознаня Републики Сербиї. Петро Файфрич умар 11. марца 2021. року у Шабцу од пошлїдкох коронавируса.
1961 – Основани Дом култури Руски Керестур у хторим активни велї члени у рижних секцийох (фолклорна, хорска, музична, рецитаторска,..) як єдна професийна институция у култури Руснацох у Сербиї центер є културного живота нє лєм Руского Керестура, алє и Руснацох у Републики Сербиї. Попри порядней роботи прейґ секцийох, Дом култури Руски Керестур орґанизатор фестивалох – Драмски мемориял Петра Ризнича Дядї, Фестивал рускей култури „Червена ружа” и Културна манифестация „Костельникова єшень”. Ансамбли Дома култури зазначели госцованя у Сербиї и у велїх жемох Европи. За свою роботу у обласци култури Дом култури наградзени и зоз Орденом заслуги за народ, Вукову награду КПЗ Сербиї, Искру култури КПЗ Войводини, Награду ошлєбодзеня Войводини, Октоберску награду Општини Кула, Зарями култури КПЗ Кула…
Нєшка християнске швето Стритениє Господнє.
У Сербиї державне швето – Дзень державносци.
Нєшка и Медзинародни дзень дзецох хтори хори лєбо лїчени од малиґних хоротох.