3. ФЕБРУАР – На нєшкайши дзень народзени дюрдьовски учитель Максим Давосир и композитор Феликс Менделсон.
1809 – Народзени нємецки композитор и дириґент Феликс Менделсон (Гамбурґ, 3. фебруар 1809 – Лайпциґ, 4. новембер 1847), у його опусу симфониї, концерти, ораториюми, кравирска и камерна музика.
1881 – Подписани контракт о вибудови гайзибанскей драги Беоґрад – Ниш, першей у Сербиї.
1901 – Народзел ше учитель Maксим Давосир (Тернополь, 3. фебруар 1901 – Нови Сад, новембер, 1976). Учитель Maксим Давосир ше народзел у валалє Островшик, коло Трембовля, Покраїна Львов Україна. Максимово путованє по билим швеце почало од Мославини, Заґребу, Крижевцох, Чаковцу, Петнї, Болцу, Митровцу по Силбаш, Ридїцу, Вербас, Дюрдьов и Нови Сад у Бачки. Його родичи, окрем Максима, мали ище шесцеро дзеци: Марию, Анку, Кату, Михала, Цилу и Ґенчия, а без жеми, худобни, прилапели поволанку владики Дрогобецкого пойсц на роботу до Крижевцох. Там Максим бул питомец „конвикта“, або школярского дому (интернату), школяр першей класи основней школи. После основного образованя, школованє предлужел у Заґребе, дзе од 1915/1916. школского року ходзел до учительскей препарандиї хтору 1919. року закончел у Чаковцу. Перше роботне место му було у Жумберку, а по одслуженю воєного року у Сараєве и Осиєку приходзи до Бачки, до Силбашу, а потим у Дюрдьове достал стаємну роботу учителя. У тим нашим руским месце жил и робел 24 роки. Людзе у валалє го волали „мадїстер“, а школяре „пан учитель“. Учитель Максим Давосир умар у новембре 1976. року у Новим Садзе, поховани є на теметове у Петроварадинє.
1906 – Русийски писатель Лєв Толстой постал член Сербскей кральовскей академиї.
1919 – У Паризу отримана перша схадзка Дружтва народох, 9 днї по снованю тей шветовей орґанизациї.