5. ДЕЦЕМБЕР – На нєшкайши дзень народзели ше Гелена Крклюш и Михайло Биндас.
1901 – Народзени режисер, аниматор и продуцент Волтер Елаяс Дизни познати як Волт Дизни (Чикаґо, ЗАД, 5. децембер 1901 – Бербанк, ЗАД, 15. децембер 1966), творец модерного рисованого филма, добитнїк аж 29 Оскарох. Вєдно з братом Ройом Дизнийом основал Продукцию Волта Дизния (Walt Disney Productions).
1936 – Народзела ше Гелена Крклюш, дзивоцке Фейди (Кула, 5. децембер 1936 – Ґосподїнци, 2. май 2024). По фаху була машински технїчар, жила у Беоґрадзе и робела у подприємстве Утва. Кед пошла до пензиї преселєла ше до Ґосподїнцох. Як подобова уметнїца, малярка аматерка мала осем самостойни вистави у Ґосподїнцох, и вецей колектвни. Мальовала пейзажи, портрети, мертву природу, сакрални мотиви, хасновала подобову технїку олєй на платну. Була член Друштва за руски язик, литературу и културу и учашнїца на Подобовей колониї Стретнуца у Боднарова у Ґосподїнцох. Умарла 2. мая 2024. року, похована є на теметове у Ґосподїнцох.
1946 – Народзел ше радийски и телевизийски новинар Михайло Биндас (Руски Керестур, 5. децембер 1946 – Нови Сад, 22. септембер 2025). Перши пейц класи Основней школи закончел у Руским Керестуре, а потим и Ґимназию у Новим Садзе. Абсолвовал Югославянску литературу на Филозофским факултету. Позарядово закончел студиї журналистики у Заґребе, як стипендиста Радио Нового Саду. Од 1974. року бул заняти у РНС, а до пензиї пошол 2011. року. Робел на емисийох репортажного характеру, бул заменїк и помоцнїк главного и одвичательного редактора програми на руским язику Радио Нового Саду, редактор емисийох Културна панорама и Аґенция, подїя, надїя, ушорйовал велї емисиї и бул редактор информативних емисийох. Поховани є 24. септембра у Руским Керестуре.
1952 – У Беоґрадзе основани Музей Николи Тесли, хтори отворени 1955. року и у хторим єст вецей як 150 тисячи документи, патенти, макети, модели апаратох, библиотека и статї хтори обявени о ґениялному науковцови.
Нєшка Медзинародни дзень волонтерох, хтори ше означує як здогадованє на дзень кед 1970. року направена Програма Зєдинєних нацийох за волонтерох.
Шветови дзень жеми, тла. Ґенерална скупштина Зєдинєних нацийох 2013. року преглашела Шветови дзень тла же би ше указало на значносц очуваня квалитету и защити тла и орґанизмох у тлу, а хтори одвичательни за одвиванє велїх процесох значних за людску популацию.