На схадзки Националного совиту Руснацох о планох и звитох

автор М. Джуджар
330 Опатрене

РУСКИ КЕРЕСТУР – Вчера отримана порядна 23. схадзка Националного совиту Руснацох (НСР) на хторей преважно дискутоване о планох и звитох, насампредз, Националного совиту, алє и установох, институцийох и здруженьох котрим Совит снователь.

Схадзки присуствовали штернац члени, шицки точки дньового шора прилапени, а векшина точкох єдногласно.

Члени НСР, першенствено прилапели Записнїки зоз предходних схадзкох, потим Финансийни звит Совиту и Звит о роботи предсидателя зоз прешлого року, та Звит Вивершного одбору, як и Звити о роботи одборох и Роботних целох НСР.

Надалєй, по дньовим шоре, пре задзекованє, членства у Одборе за образованє розришени и два членїци, Наталия Будински, директорка ОШШ зоз домом школярох „Петро Кузмяк”, и Даниєла Сопка воспитачка ПУ „Бамби” у керестурскей Дзецинскей заградки Цицибан, а на їх места буду меновани Каролина Джуджар зоз керестурскей Школи, и Наташа Варґа зоз Цицибану.

На схадзки прилапени Финасийни звит и Звит о роботи за 2023. рок Заводу за културу войводянских Руснацох. Надалєй, цо ше дотика Заводу, дата согласносц на нову систематизацию, по котрей ше отвера ище єдно, треце стаємне роботне место, а шицко у складзе зоз предписанями як предвидзене зоз Покраїни. Потим, усоглашени и пременки у УО Заводу, як член зоз шора занятих менована Марина Хома на место бувшей занятей Анї Делач.

Єдногласно прилапени и Звит о роботи и Финансийни звит за 2023. рок Руского народного тетру „Петро Ризнич Дядя”, та и план за наступни рок.

Тиж так, єдногласно прилапени и Звит о роботи, Финансийни звит за 2023. рок НВУ „Руске слово”, алє и План роботи и Финансийни план за чечуци 2024. рок.

Пред конєц схадзки, члени мали нагоду потвердзиц и даскельо Одлуки Вивершного одбору, медзи котрима и даваня думаня о назви улїци Ґорана Йоїча у Новим Садзе, даванє думаня о розришеню односно менованю директора установи Студентски културни центер у Новим Садзе, даванє думаня о менованю диекторки ОШ „18. октобер” у Новим Орахове, и о Предкладу Одлуки о мрежи установох школярского, односно студентского стандарду.

Медзи иншим розпатрени и Звит о роботи „Фонадациї Рутенорум”, а зоз меншу дискусию порушане питанє о потреби за єй функционованьом, окреме у такей форми яка є. Позитивно вигласани и Предклад о розподзельованю средствох по конкурсу зоз буджету Городу Нового Саду, на котри сцигли прияви за Фестивал малих сценских формох „Дюра Папгаргаї” и „Веселинку”.

Под точку рижне, вецей зауваги мал член НСР проф. др Михайло Фейса, а о компетенцийох над истима одвитовал предсдиатель НСР Йоаким Рац. Секретар Таня Арва Планчак поинформовала членох же нєодлуга будзе и нова схадзка пре потреби вименки Одлуки о снованю НВУ Руске слово, цо ше прилагодзує новому закону о медийох. Членїца Олена Папуґа виложела предклад о правеню новей Националней стратеґиї, а одвичательни редактор рускей редакциї РТВ Славко Орос поинформовал НСР о проблемох з котрима ше зочую редакциї РТВ, а цо окреме потрафя руску редакцию.

ПОВЯЗАНИ ТЕКСТИ