ДЮРДЬОВ/ҐОСПОДЇНЦИ – Означованє Националного швета Руснацох у Републики Сербиї у Општини Жабель, будзе у двох местох у Дюрдьове и у Ґосподїнцох.
На соботу, 17. януара локална преслава Националного швета будзе у Дюрдьове на 12 годзин. Сход будзе дзешец минути скорей 12 годзин опрез будинка Културно-уметнїцкого дружтва „Тарас Шевченко”, а потим ше традицийно положи три застави на будинок Месней заєднїци, Рускей школи и Дружтва.
У КУД „Тарас Шевченко” будзе пригодна програма, як и друженє, коктел и послуженє з домашнїма традицийнима рускима єдлами котри за тоту нагоду пририхтаю жени членох и членїци Управного одбору КУД „Тарас Шевченко”.
Преслава Националного швета Руснацох у Господїнцох почнє на 13:30 годзин у парохиялним доме Грекокатолїцкей церкви св. архангела Михаїла дзе будзе пригодна програма у котрей, традицийно буду участвовац члени дюрдьовского КУД. После того будзе коктел и друженє.