НОВИ САД – На порядней Рочней скупштини Дружтва писательох Войводини (ДКВ), всоботу 18. марца, нашей писательки Ирини Гарди Ковачевич уручена Награда за животне дїло, за литературни опус.
Лауреаткиня Ирина Гарди Ковачевич гварела же є нєсподзивана и наглашела же трима же то припознанє и нашей рускей литератури, хтора часц войводянскей литератури. Додала же ше чловек вше крашнє чувствує кед видзи же ше почитує тото цо роби, а нє лєм замерковює, и же можеме видзиц же наш живот лєм преход през тот час и треба зохабяц шлїд.
Порядну Рочну скупштину ДКВ отворел предсидатель Йован Зивлак зоз словами же пре епидемию два роки нє отримали Скупштину и поинформовал же за тот час тоти просториї у хторих Дружво (Братох Рибникар 5, Нови Сад) конєчно Город Нови Сад и додзелєл ДКВ. Потим зоз минуту цихосци указана почесц скоро двацец членом хтори ше упокоєли у медзичаше. После звиту Комисиї за приєм нових членох, хтори пречитал Владимир Кочиш, представени и нови члени Дружтва.
На отриманей Скупштини додзелєни вецей припознаня, понеже Скупштину нє отримане вецей роки. Окрем Ирини Гарди Ковачевич, Награду за животне дїло, за литературни опус достали и Пера Зубац, Радивой Шайтинац, Бранка Милькович, а додзелєни и награди за кнїжку рока и награди за преклад рока.
Награда за животне дїло Дружтво писательох Войводини додзелює од 1980. року, а од 2004. року Одлуку о додзельованю награди приноши жири и од теди ше тоту награду додзелює кажди нєпарни рок и то членом ДКВ старшим як 60 роки.
По здогадованьох Ковачевичовей, Награду за животне дїло з рускей заєднїци остатнї достал Дюра Папгаргаї (Руски Керестур, 11. X 1936 – Нови Сад, 15. III 2008), ище 2001. року.
