РУСКИ КЕРЕСТУР – На 6. манифестациї „Керестурски котлїк” котри отримани 26. авґуста пополадню на базену у Руским Керестуре, найлєпши рибов паприґаш наварели екипи з Лалитю, и Сивцу. Перше место освоєл паприґаш хтори наварел Ярослав Валент з Лалитю, другопласовану екипу зоз Сивцу представела Лїляня Юркович, а з трецим местом оценєти паприґаш цо наварел Лалитянь Янко Чрєпок.
Паприґаши хтори були означени з числами обєктивно оценьовал искусни трочлени фахови жири, а тром найлєпшим змагательом пехари спред орґанизатора уручел предсидатель Здруженя спортских рибарох „Коляк” Михайло Пашо.
На тогорочним Котлїку котри уж традицийно орґанизує керестурске Здруженє спортских рибарох Коляк, участвовали 20 екипи, а попри домашнїх и лалитянох и сивчанох було и дружтво з Коцура.
Треба спомнуц же того року всоботу пополадню на керестурским базену була нє мала гужва бо ше источашнє на єдним боку отримовало „Керестурски котлїк”, на другим боку базена було Мото-стретнуце, а попри учашнїкох тих двох манифестацийох у базену було вельо купачох. На горуцих 38 ступньох могло ше крашнє дружтвовац, засмачиц ше и розхладзиц, та уживац у добрей рок музики и вельких моторкох.
