НОВИ САД – На робно-берзанским тарґовищу прешлoго тижня вкупни обсяг обтоку бул 1.360 тони роби, зa 22,52% векши як тидзень пред тим. Финансийна вредносц вкупного обтоку виношела 32.444.000 динари, сообщене зоз Продуктней берзи Нови Сад.
Примарна култура у тарґовини була кукурица зоз 66% у вкупним обсягу обтоку, алє векше поглєдованє од понуканя нє приведло до пороснуца цени. Кукурицу ше предавало у ценовним розпону од 17,50 пo 18,50 дин/кґ без ПДВ. Пондерована цена була 17,90 дин/кґ без ПДВ (19,69 дин/кґ з ПДВ), так же того тижня обачлїве зменшанє цени од 2,92%.
На тарґовищу жита було менше и понуканє и поглєдованє. Жито ше предавало по цени oд 21,50 пo 24,00 дин/кґ без ПДВ. Пондер цена була 22,44 дин/кґ без ПДВ (24,68 дин/ з ПДВ). У одношеню на предходни тидзень, цена жита зазначела пороснуце од 11,44%. У вкупним обсягу тарґовини жито участвовало зоз 15%. Заключени и єден берзански контракт за жито з гектолитром од 72 по кили, по цени од 18,50 дин/кґ без ПДВ.
На тарґовищу сої анї прешлого тижня нє було вецей активносци, а поглєдованє було на паритету ЦПТ купец. Заключени єден берзански контракт за зарно сої по цени од 52,50 дин/кґ без ПДВ з обраховйованьом квалитету (57,75 дин/кґ з ПДВ), цо источашнє представя и пондер цену. У одношеню на предходни тидзень зазначени менша цена сої од 2,5%.
Од другей роби, тарґовело ше зоз слунечнїковим макухом зоз 33% протеини у ценовним розпону од 30,50 пo 31,50 дин/кґ без ПДВ.