Финансиї ище вше вельки проблем

автор А. Медєши
215 Опатрене

РУСКИ КЕРЕСТУР – Вчера у просторийох Месней заєднїци у Руским Керестуре отримана порядна Рочна скупштина Спортского здруженя спортских бавискох „Яша Баковˮ на хторей ше найважнєйши одлуки дотикали проблему коло нєдостатку финансийох за наиходзаци рок. На Скупштини, попри представнїкох спортских здруженьох и клубох хтори участвую на Бавискох, присуствовал и нєдавно вибрани предсидатель Националного совиту Йоаким Рац.

На початку, предсидатель Управного одбору того Здруженя, Иван Папуґа, констатовал же турнирски рок успишно закончени, а у прешлим року отримани шеснац екипни и осем поєдинєчни турнири. Першираз у рамикох Бавискох отримане змаганє у вареню пасулї концом юлия у Руским Керестуре.

На змаганьох участвовали вкупно 84 екипи, 125 змагателє у поєдинєчней конкуренциї, док вкупно у прешлим року участвовали 358 змагателє.

Кед слово о финансийох, о хторих ше и найвецей дискутовало на Скупштини, за отримованє змаганьох, зоз рижних донацийох и котизацийох, у прешлим року Здруженє у каси приходовало 29.000 динари, док розходи виношели 60.006 динари, цо значи же на концу рока на рахунку зазначена утрата у виносу од 31.000 динари. И попри тим, у 2023. року на рахунку СЗСБ „Яша Баковˮ ма 49.730 динари.   

Пре наґативни салдо на концу рока, на схадзки принєшена и одлука же би Здруженє утаргло помоц суорґанизатором на терену хтора остатнї два роки виношела 100 динари по змагательови.

На Скупштини бешедоване и о планох за роботу того Здруженя у наиходзацим року, та за даєдни змаганя уж познате дзе и кеди буду отримани, док за дзепоєдни змаганя места и термини отримованя буду накнадно утвердзени.

ПОВЯЗАНИ ТЕКСТИ