КУЛА – Прешлого викенду, всоботу, 14. фебруара у Кули була отримана трибина под назву „Жени без страху” на хторей присуствовали числени гражданє.
По законченю трибини колона людзох ше прешейтала по Полицийску станїцу у Кули, дзе символично виражели нєзадовольство, и вербално ше зражели зоз полицию понеже ище вше нє пренайдзени виновнїки котри анонимно грожели женом.
На трибини бешедовали Наталия Симович зоз Женского автономного фронту, и два опозицийни одборнїци у Скупштини општини Кула, Бояна Радович и Николина Дринич.
Причина за орґанизованє трибини були анонимни гроженя на дружтвених мрежох 14 дзивком и женом котри активни у дружтвено-политичним живоце, насампредз як формална и нєформална опозиция у општини Кула, а медзи нїма и особи зоз Руского Керестура.
Дзивки и жени котрим грожене, и чийо мена и презвиска явно обявени на анонимним профилу на дружтвених мрежох, поднєсли виновни прияви, о чим ше ґрупа гражданох и розправяла того вечара зоз полицию. Як нєурядово дознаваме, виновнїки не пренайдзени, док анонимни профили сцерани и ознова правени нови зоз истима гроженями.
Як поручене зоз трибини, и кед би ше пренашли виновнїки, кара котра шлїдзи за тото виновне дїло гет менша од чкоди котра настава як пошлїдок диґиталного насилства. У конкретней ситуациї, можлїве же би були обявени змисти без согласносци особох котрим грожене, алє и же би були направени фалсификовани змисти з помоцу штучней интелиґенциї.
Политични случованя и активносци у општини Кула вше баржей кулминую, локални виберанки маю буц отримани наяр, алє су ище нє розписани. Урядово предвиберанкова кампаня ище вше нє почала, док нєурядово, предвиберанкова кампаня навелько почала ище у децембру прешлого року.
Организатор трибини була политична странка Желєно-лїви фронт.
