РУСКИ КЕРЕСТУР – У орґанизациї Дзецинскей заградки Цицибан Предшколскей установи Бамби з Кули, вчера 1. априла у полней сали Дома култури у Руским Керестуре отримани традицийни 29. Бамби фест, манифестация у хторей наймладши маю нагоду представиц шицко тото цо през рок научели.
Програма була весела, рижнородна и змистово богата, та публика уживала у интересантних наступох насампредз дзецох старших воспитних ґрупох хтори з тей нагоди пририхтали числени хореоґрафиї на познати дзецински шпиванки, рецитациї и музичнии точки, а хтори дзеци виведли зоз окремним ентузиязмом.
Роботу и бависко младших воспитних ґрупох публика могла видзиц на фотоґрафийох хтори були приказани прейґ видео-биму. На програми ше представели и дзеци зоз музичней секциї хторих пририхтала музична сотруднїца Татяна Фейди.
Кажда воспитна ґрупа дзецох, дзекуюци своїм воспитачком, представела ше на окремни способ, указуюци креативносц, труд и роботу хтору укладали през цали рок.
Окремни упечаток охабела интересантна сценоґрафия як и осторожно обдумани костими хтори ище лєпше дополнєли цале дожице.
Конферансу на програми водзел Александар Планкош, а технїчна потримовка були Сашо Палєнкаш и Борис Пашо.
