КУЛА – Тих дньох, ознова розпочата реконструкция улїци Дюру Струґара у Кули, котра реконструована прешлого року зоз проєктом реконструкциї парку, котри вєдно коштал 162 милиони 976 тисячи динари.
По словох предсидателя Општини Кула Дамяна Милянича, трошки терашнїх роботох у улїци Дюру Струґара у цалосци зноши виводзач роботох, и же ґарантни рок ище вше нє почал чечиц, понеже надпатраюци орґан Општини Кула благочасово обачел одредзени нєдостатки. Ґаранция почнє чечиц док буду одклонєни шицки нєдостатки, а як наведзене у його сообщеню, дзепоєдни нєдостатки єст и на окончених роботох у парку.
Най здогаднєме, у улїци Дюру Струґара виняти цали шор древох котри локалне еколоґийне здруженє теди попробовало пресадзиц на другу локацию. Заменєна гидрантска мрежа, и преляти нови асфалт на драги и паркинґох.
Тераз зрипане верхнє пасмо асфалту, як нєурядово дознаваме прето же на дзепоєдних местох покривки зоз шахтох були вистирчени, а на асфалту ше затримовала вода кед падал диждж. Тераз будзе преляте нове пасмо асфлату. Улїца цалком заварта за транспорт, а предвидзене же роботи буду тирвац по 1. май.