ОПШТИНА ШИД – На швето Обрезаниє Исуса Христа и Святого Василия Велького односно на Нови рок по юлиянским календаре всоботу 14. януара у грекокатолїцких церквох у Општини Шид служени Служби Божо.
У Шидзе Службу Божу служел парох о. Михайло Режак и сообщел стан у матрикулох же у прешлим року нє було повинчаних, покресцени двойо дзеци – дзивчата, а 15 особи поховани.
У церкви у Бачинцох Службу Божу Святого Васлия Велького служел парох о. Дарко Рац и з тей нагоди гварел же у прешлим року нє було повинчаних и кресцених, а поховани три особи.
У церквох у Беркасове и Бикичу Служби Божо служел парох о. Владимир Еделински Миколка и сообщел же у Беркасове у прешлим року нє було повинчаних и кресцених, а три особи поховани, а у Бикичу єдна малженска пара повинчана, було три кресценя и поховани три особи.