РУСКИ КЕРЕСТУР – Отримана перша схадзка Орґанизацийного одбору Туристично-привредно-културней манифестациї „Днї керестурскей паприґи”, хтора будзе 19. авґуста.
На схадзки бешедоване о концепту и змистох хтори ше планує на манифестациї и предложене же би попри културно-уметнїцкей часци, дефилеа парадних запрагох Конїцкого клуба Русин, бул и маскенбал. И того року ше будзе виберац найлєпши штанд, мерац найчежшу паприґу, а нащивителє годни опатриц Музейну збирку у Замку. Уж традицийно будзе ше вариц єдла у котлох, а планує ше и нащивиц оглядни поля кед годно пре хвилю.
Потвердзене же на Манифестациї того року нє будзе змаганє у вареню айвара – „Изађи ми на теглу”.
Од општини Кула за орґанизацию ше достанє 500.000 динари, а обчекує ше и средства од длугорочних спонзорох. Тиж ше того року за средства конкуровало и до Покраїни.
Кед слово о музики, єст вецей предкладаня, и будзе ше виберац и гласац спрам можлївосцох, односно буджету.
Бина будзе на истим месце як и прешлого року, а кед будзе падац диждж збуваня на Манифестациї ше премесци до Младежского дому.