ВЕРБАС – У Вербаше од 23. по 27. май будзе юниорски VII Куп нацийох у боксу. Жребаня буду 22. мая, а финални борби, заказани за 27. май. Рок за приявйованє отворени по 12. май.
Орґанизацийни одбор VII Купу нацийох почал з пририхтованями за тогорочни турнир юниорских боксерских надїйох, котри будзе у Вербаше од 23. по 27. май. Як поведзене на схадзки отриманей того тижня, перши репрезентациї до Вербасу сцигую уж 21. мая, за 22. май заказани жребаня, а шлїдуюцого дня рушаю и перши борби. Финални борби, по програми, заказани за 27. май.
По словох члена Општинскей ради задлуженей за спорт Срдяна Станича, Куп нацийох у боксу постал традицийна спортска манифестация у Вербаше и на найлєпши способ представя тот город, спортистох и шицких гражданох. З тей нагоди и окреме подзековал предсидательови Войводянского боксерского союзу Желькови Мрдаковичови и предсидательови Боксерского союзу Сербиї Ненадови Боровчанинови, як визначел, на потримовки и закладаню же би Куп нацийох у Вербаше постал єден з найлєпших турнирох котри зазберує младих боксерох зоз шицких континентох.
Директор турниру Йован Панич визначел же ше обчекує значно масовнєйши турнир як прешлого року. По 12. май, покля отворени рок за приявйованє, наздаваю ше же ше дойдзе по число од вецей як 150 юниорки и юниоре, котри ше буду змагац у 13 чежинских катеґорийох. Слово о возросту од 15 и 16 роки и турнир у Вербаше будзе остатнї тест за шицки репрезентациї котри ше пририхтую за Першенство Европи за юниорох.
На першей схадзки Орґанизацийного одбору присутни були и представнїки Центра за физичну културу „Драґо Йовович”, Полицийскей станїци Вербас, Дома здравя „Велько Влахович”, як и представнїки Туристичней орґанизациї општини Вербас, Червеного крижу Вербасу, Союзу спортох општини Вербас и Културного центру Вербаса.
