НОВИ САД – Вибудов швидкей драги, длугей 185 километери повяже териториї Зомбора, Кули, Вербаса, Србобрана, Бечея, Нового Бечея и Кикинди, наволаней „Ошмих Войводини”, гвари ше у сообщеню Покраїнскей влади. Роботи на вибудови першей часци швидкей драги почали вчера у Бачким Брегу.
На початних роботох були присутни Министер будовательства, транспорту и инфраструктури Ґоран Весич, Предсидатель АП Войводини Иґор Мирович, городоначалнїк Зомбора Антонио Ратковић, амбасадор НР Кини Ли Минґ, подпредсидатель Влади Сербиї и министер охрани Милош Вучевич.
Предсидатель Покраїнскей влади Иґор Мирович гварел же того тижня почали роботи на вибудови автодраги Беоґрад – Зренянин – Нови Сад, а вчера на вибудови швидкей драги „Ошмих Войводини”. Зоз тим, алє и з другима конкретнима проєктами, за наиходзаци седем до осем роки увидзиме цалком нову слику Войводини, а з тим и цалей нашей держави.
Министер будовательства, транспорту и инфраструктури Ґоран Весич наглашел же тота швидка драга значна за розвой шицких городох на тей траси и же злєпша квалитет животу людзох. Спрам його словох, швидка драга од Бачкого Бреґу по Сербску Црню будзе уклопена до мрежи автодрагох Мадярскей и Румуниї.
Швидка драга наволана як „Ошмих Войводини” проєктована на швидкосц од 100 километри на годзину. На часци швидкей драги од Зомбора по Кикинду, плановане же ше вибудує 46 мости (на каналу и преходи за драгу), 34 надвожнїки и пейц подвожняки и 35 препусти. Тиж ше планує и вибудовац 12 ґузли: Зомбор, Кляїчево, Сивец, Червинка, Кула, Вербас Заход, Вербас Сивер, Вербас Восток, Вербас Е75, Србобран Сивер, Турия и Кикинда Восток. Планована и вибудов 13 поверхових кружних розкрижйох.