РУСКИ КЕРЕСТУР – Потим як на схадзки о води порадзене же ше будзе зберац подписи за ище єдну тужбу, догварене же шицки заинтересовани, нє лєм тоти на хторих глаши рахунок за воду алє шицки полнолїтни Керестурци, по 1. авґуст можу пойсц до канцелариї адвокатки Мариї Йоксович у Кули, кажди роботни дзень од 9 по 20 годзин.
За тих хторим нє одвитує пойсц до Кули, по схадзки порадзене же подписац мож и у валалє, у Землєдїлскей задруґи „Керестурска паприґа” кажди роботни дзень од 8 по 16 годзин. Зоз собу треба вжац лєм особну карточку.
Най здогаднєме, на схадзки предложене же би ше порушал ище єден поступок, тераз за потупенє права особи за нєматериялну чкоду, же би ше на таки способ окончел прицисок на тих цо треба, з оглядом же уж єст приклади у других општинох у хторих таки способ дал конкретни резултати. Як визначела адвокатка, цо вецей людзе придаю тужбу зоз тим векши шанси же тужба будзе успишна. У тужби ше поглєдує пенєжне надопольнєнє за каждого понаособ, алє нє треба обчековац пенєж алє конкретне ришенє проблему води за пице у Руским Керестуре и Крущичу прейґ мирного спору.