Позарядова ситуация и у Новим Садзе

автор Я. Дюранїн, Фото vojvodina.gov.rs
405 Опатрене

НОВИ САД – После велькей нєпогоди котра стреду залапела цалу державу, городоначалнїк Нового Саду Милан Дюрич, на предкладанє Городского штабу за позарядово ситуациї, принєсол одлуку о преглашованю позарядовей ситуациї на териториї Нового Саду.

Така одлука мушела буц принєшена прето же пошлїдки бурї нє могли буц нашвидко спатрени, а чкода барз велька, та ше за ришованє тих проблемох муша активовац и додатни моци и средства, гвари ше у сообщеню Городскей хижи.

Городски штаб за позарядово ситуациї отримал схадзку, а компетентни инспекторе и комунална полиция на вецей як 100 местох констатовали поваляни древа, транспортну сиґнализацию, контейнери, поваляни огради и однєшени закрица, електрични води и друге.

Гражданє котри и надалєй маю бриґи можу ше явиц диспечерови Городскей управи за инспекцийни роботи на телефон 021/4872-402 и 021/4872-403, лєбо на имейл адресу dispecer@inspekcija.novisad.rs.

Позарядову схадзку отримала и Покраїнска влада вєдно зоз Покраїнским штабом за позарядово ситуациї дзе, медзи иншим, констатоване же нєпогода на териториї цалей держави залапела 15 управни округи, вноци зоз стреди на штварток було 219 интервенциї, 20 огнї, на 157 местох ше скланяло поваляни древа и 20 евакуациї гражданох. На терену були анґажовани 540 огньогасци на 221 превозки, а екипи буду на терену покля ше нє риша шицки пошлїдки моцней бурї.

ПОВЯЗАНИ ТЕКСТИ