Марина тераз уж дипломовала на Медицинским факултету у Новим Садзе на напряму радиолоґиї, шицки испити положела на час, тераз єй остало одробиц приправнїцки стаж, а потим ше назадава же найдзе роботу у фаху. Док студирала нє геверовала, алє робела вецей сезонски роботи прейґ студентских задруґох, потим през лєто на валалє, а аж два раз ше одшмелєла путовац и робиц у иножемстве прейґ шветовей програми за младих Work&Travel, перше у Америки, а потим у Нємецкей.
Понеже векшина студентох котри ше опредзелюю за прогаму Work&Travel путую до Америки, так и Марина прешлого року, точнєйше влєце 2023. була у Америки, у держави Юта у месту Парк Сити. Млади одходза на таки програми же би заробели пенєж, усовершели анґлийски язик и путовали, медзитим отамаль шицки приходза и богатши за єдну праву прейґокеанску авантуру.
– Искуство хторе сом там здобула нє можем поровнац анї зоз єдним потераз. Постала сом самостойнєйша, комуникативнєйша, знаходлївша, отворенша и щешлївша. Научела сом цо значи жиц даскельо мешаци у другей держави, на другим континенту, далєко од „свойого”, як то кед ши препущени сам себе и освидомела сом ше кельо ми знача фамелия и товарише – почина розгварку наша собешеднїца.
По други раз робота у Нємецкей
Того року, уж кед була при самим концу студийох, знала же нє шме положиц шицки испити у юнию, бо статус студента и условиє за тоту програму, а виплановала себе же одпутує ище раз, алє тераз до Нємецкей и же после одробеней сезони придзе дому и будзе покладац остатнї испит.
– Початком того року сом мала дилему дзе препровадзиц тото лєто, чи знова пойсц до Америки, чи до Нємецкей. Ище кед сом була мала, сон ми бул жиц у Нємецкей, слухала сом од старших же ше там лєгчейше жиє, же мож лєпше заробиц як у нас и же лєпши условия за живот. Знала сом же раз будзем мушиц пойсц там, та гоч и лєм на даскельо мешаци. Понеже сом того року мала таку нагоду, мушела сом ю вихасновац. Приявела сом ше до аґенциї и вони далєй кончели. Мала сом єден интервю зоз роботодавательом, потим зме виберали роботу хтору жадаме робиц, бешедовали о заробку, змесценю и правилох, а бешедовали зме и по нємецки и по анґлийски – толкує Марина.
Крочай по крочай, шицко було покончене, та концом юния Марина шедла до авиона за Дортмунд, у месце Бествиґ ю чекала робота, дзе препровадзела цале лєто.
– Робела сом у забавним парку Форт Фан, у хторим єст числени атракциї за дзеци и старших, ролеркостери, рижни воженя по води, як и ресторани. Понеже зме могли виберац роботу, я вибрала робиц у ґастрономиї, у киоску зоз швидким єдзеньом, соками и сладолядом. Перши тидзень на роботи ми шицко було конфузне, прето же колеґиня зоз хтору сом робела знала бешедовац лєм нємецки и турски. Мой нємецки на початним уровню, знам ше спорозумиц и знайсц кед ми дацо треба. Потим пришол и младши колеґа зоз хторим сом могла бешедовац по анґлийски, та ми було лєгчейше.
Знашла ше у каждей ситуациї
У роботи и коло своїх задлуженьох ше швидко знашла, а после даякого часу уж лєпше бешедовала и по нємецки. Вєдно зоз парняками и колеґами нашли дополнююцу роботу.
– Мойо задлуженя були дополньовац фрижидери зоз пицом кажди дзень, робиц на каси, услужиц госцох и кед колеґом требала помоц та сом им помагала у сервираню єдзеня. Кед була велька гужва, знало ше случиц же сом робела и шицки роботи одразу. У тих хвилькох було напарте и дому сом приходзела вистата, алє ме мотивовали купени карти за наиходзаци концерти. На концу дня зме мушели пораїц за собу, мой задаток тиж була орґанизация у маґазину и правиц лїстину за поручованє состойкох, сокох, меса… Як час преходзел, навикла сом ше на роботу, алє понеже ми роботни час бул од 10:30 г рано, питала сом ше ґаздом же цо можем ище робиц. Вони ше приємно нєсподзивали, прето же нашо колеґове углавним сцели цо менєй робиц и цо скорей закончиц зоз роботу. Ютредзень од 8г колеґове зоз Сербиї и я почали пораїц цали парк. Тото задлуженє зме мали по початок шлїдуюцей роботи. Мали зме и супервизорох, хтори преверйовали чи совисно и одвичательно робиме свою роботу – визначує Марина.
Було часу и за концерти
Попри роботи, удало ше єй найсц часу за себе и пойсц на даскельо концерти. Зоз цимерами зоз Сербиї ше дружели каждодоньово после роботи.
– Були зме змесцени у двох вельких обисцох, вєдно нас було 15 и шицки зме були зоз Сербиї. Кажде мал свою хижу и мали зме три купатила и два кухнї. Вечарами зме ше дружели, картали ше, правели роштиль и палачинки. Шлєбодни днї зме хасновали же бизме обишли векши вароши. Була сом у Дортмунду, Гановеру, Дизелдорфу и на концу у Минхену. Тиж, була сом и на трох концертох – Колдплей (Coldplay), АЦ/ДЦ (AC/DC) и, по други раз, Адел.
За конєц наша собешеднїца визначела же би каждому препоручела путовац и робиц прейґ тей програми, же здобула красни памятки, а удало ше єй и заробиц.
– Час у Нємецкей ми швидко прешол пре потримовку хтору сом мала прейґ телефона и людзох зоз хторима сом була там. Упознала сом ше зоз велїма новима товаришами зоз хторима зме препровадзели хвильки хтори будземе паметац и преприповедовац цали живот. Я мам лєм позитивни искуства, и зоз Америки, и зоз Нємецкей. Дзекуюци тей програми сом заробела перши „векши” пенєж, а самостойно заробени пенєж ше баржей ценї, бо знаме кельо зме уложели часу и труду до того. Озда ше вец анї нє потроши так швидко.