НОВИ САД – При Новим Садзе Дунай ше тих дньох поцагнул баржей як звичайно. Таки нїзки вотостой, окрем на плївбу ладьох уплївує и на польопривреду, алє и на рошлїнски и животиньски швет.
При Рибарским острове ладьочки остали на сухим, лєбо у плїткей води, а води нєт анї коло дереґльох и ресторанох.
Пре окреме нїзки водостой очежани и транспорт на рики. Терховни ладї у таких условийох муша мац прилагодзену глїбину плївби и одредзену чежину терхи хтору преноша же би могли предлужиц драгу, а одредзени правила важа и за наутичарох. Апелує ше и на сплаварох же би ше склонєли зоз плївней драги и тримали ше коло концох рики и же би ше нє вязали за бови хтори би требали означовац плївну драгу.
Зоз Републичного гидрометеоролоґийного заводу (РГМЗ) сообщене же водостой Дунаю, стреду, 22. юлия при Боґоєве кус пороснул зоз тенденцию меншого пороснуца наиходзаци два днї, а вец будзе у стаґнациї. Тиса у стаґнациї и рика Сава у меншим опаданю и стаґнацию шлїдуюци штири днї.
Пондзелок при Бездану водостой Дунаю бул минус 113 центи, а на гидролоґийней станїци у Боґоєве вимеране минус 62 центи. При Новим Садзе Дунай опаднул за 44 центи.
