КОЦУР – Други дзень тогорочней „Коцурскей жатви” почал всоботу, 20. юлия, у пополадньових годзинох у Велькей сали Дома култури.
Програма почала зоз традицийним придаваньом хлєба, котри тримали дзивки пооблєкани до руского, сербского и мадярского народного облєчива, представяюци народи котри жию у Коцуре.
Госцох привитала Марина Тодич, котра и водзела програму, а на початку уручени хлєб, упечени зоз нового жита. Хлєб котри представя, як визначене, нагоду радовац ше новому житу и новому животу прияла предсидателька Скупштини општини Вербас Тияна Алексич.
По законченю тей святочней часци програми, шлїдзели танци и шпиванки котри виведли домашнї и госцуюци дзецински фолклорни ансамбли.
Коцурскей публики ше на отриманей културней манифестациї перши представели домашнї ансамбл КУД „Жатва”, потим наймладши танцоше зоз КУД „Тарас Шевченко” зоз Дюрдьова, госци зоз Дружтва „Руснак” зоз Петровцох, як и дзецински ансамбл коцурского КУД „Завичайне врело”. Тиж, з танцом ше представели и наймладши зоз КПД „Иван Котляревски” зоз Бикич Долу, а програму заварли домашнї члени зоз КУД „Жатва” котри з тей нагоди одшпивали пар шпиванки.
Шлїдзела ище єдна з провадзацих змистох другого дня коцурскей културней манифестациї – отверанє и представянє богатих етно столох у центру валала. Предсидателька КУД „Жатва” Мелания Мали привитала нащивительох и поволалала их най покоштую шицко цо вредни коцурски жени приготовели.
На столїкох були виложени руски єдла яки рихтали нашо баби, алє и други сербски и мадярски єдла. И того року нащивителє могли видзиц и як випатрал и цо ше находзело у дакедишнїм пасарайтове. Вецей жени зоз Активу женох КУД „Жатва”, вєдно зоз женами з Активу женох КУД „Завичайне врело” и численима женами з валалу и того року приготовели рижни смачни домашнї єдла и збогацели тогорочну „Коцурску жатву”.
Окрем богатих етно столох, бул и предайни базар, та могло покоштовац домашнє пиво, купиц нєзвичайни палєнки, колачи и други домашнї продукти. При наймладших волонтерох коцурского Каритасу, котрих водзи Милка Фейса, нащивителє могли купиц даяки предмет котри дзеци сами прикрашели лєбо направели, и так гуманитарно помогнуц.
