РУСКИ КЕРЕСТУР – Керестуцом тих дньох интересантне було видзиц алпинистох – роботнїкох котри зоз алпинистичну опрему, а потим и на крану окончую роботи на турнї Церкви св. отца Миколая.
Як зме дознали од тутора керестурскей церкви Владимира Романового, перше викопани дзири за ужеменє и положена трака и сонди. Роботи на турнї барз нєзґодни, бо то барз високо, та таке можу робиц лєм людзе котри маю атест и котри за таку роботу оспособени.
Роботу пред даскельома днями розпочали алпинисти зоз Липару и Кули, а анґажовани су за тоту нагоду. Церковни одбор анґажовал и кран зоз Беоґраду на котрим алпинисти окончели догварени роботи.
Спрам словох пана Романового тераз ше з роботами идзе на долу. Поставянє громобрану велька инвестиция и одбор ше наздава же ше найдзе средства заврец финансийну конструкцию за тот проєкт.
Керестурски парох о. Владислав Варґа потвердзел же людзе и сами почувствовали потребу финансийно помогнуц на тим проєкту, та ше и сами анґажовали.
