НОРТ БАТЛФОРД (КАНАДА) – У канадскей провинциї Саскачеван, у Норт Батлфорду, прешлого викенду, од 17. до 19. юлий отримани ище єден Руски пикник.
На пикнику ше зишли вецей як 120 особи, а перши на место отримованя сцигли, уж пияток пред вечаром, як то и швечи, 25-ро млади и дружели ше цалу ноц коло огня.
Другого дня, всоботу, перши сцигли кухаре, змагателє у вареню паприґашу у котлїкох, же би полудзенок за шицких на пикнику бул на час готови. Варело ше у 10 котлїкох. Спрам одлуки жирия перше место припадло Михайлови Маґочови зоз Норт Батлфорду, дрге место завжал Джейсон Хилц зоз Саскатуну, а треце завжали Владимир Еделински и Желько Колошняї зоз Норт Батлфорду.
У рамикох каждого Руского пикнику орґанизовани и дзецински камп, та анї подросток нє геверовал. Смачни лепинї були праве їх рукох дїло бо нїхто нє шмел остац гладни. Наймладшим, їх дакус старши товарише мальовали по тварох, а найвекша радосц им було спущованє по мокрей спущовалки (замку на надуванє) до базену з воду.
Старши препровадзовали час у красним друженю, и зоз приятелями зоз хторима ше нє стретаю у иншаких нагодох. У розгваркох и франтох остали до вечарших годзинох. А млади ше остали ище єдну ноц дружиц коло огня.
Тогорочни Руски пикник спонзоровали: нєпрофитна орґанизация СаскКултура, ресторан ланца ресторанох Тим Хортонс у Норт Батлфорду, тарґовински ланєц ЦО-ОП у Норт Батлфорду и Джейсон Хилц и Моника Тамаш зоз Саскатуну.
На концу треба спомнуц же традиция отримованя Руского пикнику у Саскачевану тирва од 1998. року. Як на кажди по тераз так и на тот тогорочни сход останю лєм накрасши памятки.