СЕРБИЯ – Студенти у блокади орґанизовали внєдзелю 28. децембра ширцом Сербиї акцию Розпиш побиду у хторей зберали подписи за розпущованє Народней скупштини и розписованє позарядових парламентарних виберанкох.
У Новим Садзе гражданє зоз своїм подписом могли потримац студентох на 28 местох. На даєдних, скорей обявених локацийох студенти були од 9 до 12 годзин, а на вецей местох сцерпезлїво одвитовали на питаня гражданом од 9 до 17 годзин. У универзитетским кампусу подписац ше могло од 12 до 22 годзин, а орґанизовани бул и Гуманитарни новорочни базар.
У Руским Керестуре подписи зберали студенти, представнїки нєформалней ґрупи Млади Руски Керестур. Як Рутенпрес дознава, одволанє гражданох було вельо векше як цо орґанизаторе обчековали, подписац могло од 9 до 17 годзин, та аж и дакус длужей покля було заинтересованих гражданох. Зоз своїм подписом, гражданє охабяли лєм податки за контакт, и согласносц же би були обвисцени о студентских активносцох.
У спомнутей акциї, студенти зберали подписи и у местох у кулскей општини: Кули, Сивцу, Червинки, Липару и Крущичу.
Акция отримана и у Коцуре, а велї людзе станули побешедовац зоз студентами у центру валала и подписали папер з котрим потримали їх акцию.
У Жаблю того дня, потримовку акциї з власним подписом дало коло 500 гражданох.
У Шидзе од 9 по 12 годзин подписи ше зберало у центру коло парку, а потим до 15 годзин пункт бул опрез Културно образовного центру.Урядово информациї кельо назберане подписи нєт, алє нєурядово орґанизаторе задовольни и гварели же дополадня було вецей старших, а пополадню младших согражданох, акцию лоґистично помогол Збор гражданох Шиду.
У спомнутей акциї, студенти зберали подписи у вецей як 100 општинох, и на вецей як 400 штандох по цалей Сербиї.
Студенти у блокади вчера, 29. децембра обявели же внєдзелю назберали 393.045 подписи од гражданох хтори потримали спомнуту акцию, у Войводини, як обявели, назберане 93 тисячи, а у Новим Садзе 40 тисячи подписи.
