РУСКИ КЕРЕСТУР – На штвартковим стретнуцу за старши особи у Каритасу др Златана Надь шицким присутним померала прицисок, волонтере им вимерали цукер у креви, а по закончених препатрункох дохторка и посовитовала кажого спрам потреби.
Як уж звикли, помодлєли ше и зашпивали шпиванки о Мацери Божей, бо октобер то и єй мешац, у чим им помогла шестра Терезка Сопокова, котра и сама по пензию робела як медицинска шестра, та и вона вше може дац даяки совит, чи здравствени чи духовни. Зоз волонтерами побешедовали о тим цо ше им случовало през тидзень, пожартовали и почасцели ше зоз цеплима напитками и лакотками.
Идуцого штвартку волонтере пририхтали стретнуце у Водици зоз Службу Божу, за цо ше им обезпечи и превоз.