ВЕРБАС – У просторийох Културно-просвитного дружтва „Карпати” у Вербаше, нєшка собота, 23. септембер будзе традицийна манифестация Фестивал хорского шпиваня, котра того року будзе отримана по тринасти раз.
На Хорским фестивалу наступя домашнї Хор КПД „Карпати” з Вербасу, Хор Руски културни центер з Нового Саду, Хор „Дюра Киш” зоз Шиду, Церковни хор зоз Коцура, Хор Културного центру Вербас „Бачки шпиваче” (Бачки певачи) и женска и хлопска шпивацка ґрупа Дома култури Руски Керестур.
Манифестацию потримали Национални совит рускей националней меншини, Покраїнски секретарият за културу, явне информованє и одношеня з вирскима заєднїцами и Покраїнски секретарият за образованє, предписаня, управу и национални меншини – национални заєднїци, Завод за културу войводянских Руснацох и Општина Вербас.
Фестивал хорского шпиваня почнє на 19 годзин у просторийох Дружтва у Вербаше.