КОЦУР – На площи опрез Основней школи „Братство єдинство” у Коцуре всоботу, 1. фебруара, отримана штварта манифестация „Капушнїк фест”, у орґанизациї Туристичней орґанизациї општини Вербас.
И того року жени зоз Активу женох КУД „Жатва” и Активу женох КУД „Завичайне врело” були задлужени за пририхтованє и випеканє капушнїкох, традицийного єдла хторе ше у тим валалє рихтa у шицких обисцох, без огляду на виру и националносц.





Присутних привитал предсидатель општини Вербас Милан Ґлушац, а директорка Туристичней орґанизациї општини Вербас Мария Златович-Арсениєвич додзелєла и окремне припознанє Златни фартух членїци Активу женох КУД „Завичайне врело” Слободанки Русковски.
За добре розположенє числених нащивительох постарали ше „Коцурски бетяре” котри потим вишли на бину, а музика, шпиванка и танєц ше розляли по центру валала, и прикрашели тот слунечни дзень и валалску манифестацию.


Найвекшу повагу нащивительом прицагла часц валалскей площи дзе жени з Активу женох нєпреривно рихтали и пражели капушнїки, а шицки заинтересовани задармо могли коштовац тото традицийне коцурске єдло. До пополадньових годзинох, жени приготовели и подзелєли вецей як 2.500 капушнїки, а орґанизаторе обезпечели цепли чай и варене вино же би ше нащивителє ошвижели и зограли.
У центру валала того дня були поставени и числени штанди, а свойо продукти, лакотки, мед, палєнки, колачи, месово продукти, ручни роботи и инше виложели, окрем числених домашнїх викладательох, и госци з других околних местох. За наймладших орґанизоване друженє зоз Мики и Мини Маус и другима маскотами, рисованє по тварох, а ту бул и дворец на надуванє.



На часци площи опрез Основней школи були поставени експонати зоз Етно-клубу „Одняте од забуца”, та нащивителє могли поопатрац предмети зоз историї народох з того валалу и уживац у културних змистох.
У орґанизованю, окрем компетентних зоз Туристичней орґанизациї Вербас, участвовали и представнїки локалней самоуправи, Покраїнски секретарият за привреду и туризем, Месней заєднїци Коцур, представнїки числених валалских здруженьох и установох, як и представнїки КУД „Жатва” и КУД „Завичайне врело”, и членїци Активох женох обидвох Дружтвох.