КОЦУР – Ловарске дружтво „Сокол” зоз Коцура воботу, 13. януара орґанизовало „Ловарски бал” котри бул отримани у Пелетовей сали.
Того вечара ше баловало вецей як 250 госцох, як зоз Коцура, так и зоз других околних местох. Тиж, и члени вецей валалских здруженьох и Културно-уметнїцких дружтвох пришли потримац ловарох и розвешелїц ше у красней атмосфери.
Предсидатель Ловарского дружтва „Сокол” Любомир Тамаш привитал шицких госцох. З тей нагоди, представел и найстаршого ловара, як по рокох, так и по ловарским стажу, Милана Ґрандичa. Як ше здогадли шицки члени, остатнї „Ловарски бал” бул орґанизовани ище у дакедишнїм Младежским доме, а од теди прешло вецей як 20 роки.
Орґанизаторе за тот вечар, окрем смачней, правей ловарскей, вечери котра облапяла паштету зоз фазанового меса, сир, юшку зоз фазана, колбаси зоз єленьового меса и инше, пририхтали и богату томболу. Вредни и интересантни дарунки обезпечело Ловарске дружтво, а томболи даровали и числени спонзоре.
За добре розположенє и забаву госцох були задлужени „Коцурски бетяре”, а весела атмосфера, шпиванка и танєц тирвали до позних годзинох.
