КОЦУР – У Доме култури у Коцуре всоботу вечар, 18. новембра, госцовало КУД „Гавриїл Костельникˮ зоз Кули зоз дуодраму „Вистата конїцаˮ.
Дуодрама по тексту Дюри Папгаргая у интерпретациї Амалиї Ковач и Янка Лендєра, котри и режисер, одбавена пред коцурску публику у Велькей сали Дома култури. Присутни з вельку повагу на сцени провадзели живот Емила и Емилиї, старшей малженскей пари, и представени швет у котрим жию, попреплєтани зоз нїтками рижних чувствох, од шмиху по слизи.
По словох предсидателя Орґанизацийного одбору Медзинародного фестивалу „Коцурска чутка 2023ˮ проф. др Михайло Фейси, зоз тоту представу почал и тогорочни 13. Медзинародни фестивал гумору и сатири „Коцурска чутка/Куцурски клип/Kuczorai csutka/Kucura Corncobˮ.
Як гварел др Фейса, ансамбл кулского КУД „Гавриїл Костельникˮ мал свойoфайтову предґенералну пробу у Коцуре, док ґенерална, пред виводзеньом на наступним Мемориялу, була внєдзелю, 19. новембра, у КПД „Карпатиˮ у Вербаше. Зоз нащиву є задовольни, а як додал, програма за Фестивал уж скоро цалком формована, кнїжка лауреата за гумор Владимира Дудаша Иванова у друку, з Роґатици приходзи побиднїк за сатиру, а коло найлєпшей карикатури жири ище одлучує.
Министерство за туризем и младеж зоз Беоґраду додзелєло значну суму пенєжох за спомнути Фестивал, визначел др Фейса, а „Коцурска чутка 2023ˮ будзе мац и окремни сайт.
Медзинародни фестивал, 13. по шоре, будзе предлужени уж на нєдзелю, 26. новембра, зоз програму котра будзе отиримана тиж у просторийох Дома култури з початком на 16 годзин.
