РУСКИ КЕРЕСТУР – На чарди Лонґов у Руским Керестуре, стреду, 22. юлия, адвокатка Мария Йоксович зоз колеґами орґанизовала стретнуце зоз валалчанами же би их поинформовала у якей хвильково фази ситуация зоз тужбу у вязи зоз нєисправну воду за пице, алє и же би ше порушало зберанє подписох за ище єдну тужбу.
Кед слово о поступку зоз хторим керестурци вєдно тужели општину Кула за нєисправну воду за пице пре барз вельке количество отровного арсену у води, Йоксовичова гварела же ше судзенє одцагло понеже тужени бок барз часто придава вельо пригварки и жалби, о хторих ше муши окреме одлучовац, гоч нїхто нє спори же вода нє лєм же нє за пице, алє вообще анї за варенє, купанє та анї за залїванє желєняви у загради.
Праве прето предложела же би ше порушал ище єден поступок, тераз за потупенє права особи за нєматериялну чкоду, же би ше на таки способ окончел прицисок на тих цо треба, з оглядом же уж єст приклади у других општинох у хторих таки способ дал конкретни резултати.
За розлику од прешлого сходу на тему арсену у керестурскей води и поставяня филтерох за пречисцованє, на тот сход ше одволало барз мале число людзох, а як визначела адвокатка, цо вецей людзе придаю тужбу зоз тим векши шанси же тужба будзе успишна. У тужби ше поглєдує пенєжне надопольнєнє за каждого понаособ, алє нє треба обчековац пенєж алє конкретне ришенє проблему води за пице у Руским Керестуре и Крущичу прейґ мирного спору.
З оглядом на мале число присутних, на схадзки догварене же треба поволац шицких заинтересованих, нє лєм тих на хторих глаши рахунок за воду алє шицких полнолїтних керестурцох, же би цо скорей, а найпознєйше по 1. авґуст, у цо векшим чишлє пошли до канцелариї адвокатки Мариї Йоксович у Кули, кажди роботни дзень од 9 по 20 годзин и подписали полномоц за ище єдну тужбу, а на таки способ источашнє можу дознац и шицко цо их интересує у вязи зоз судским процесом хтори у цеку. Зоз собу треба вжац лєм особну карточку.
На схадзи тиж бул присутни и директор Явного комуналного подприємства „Руском” Владимир Олеяр хтори, як и на прешлей схадзки, визначел же исную два проєкти за фабрику води у валалє, медзитим за реализацию нєт обезпечени средства.