Здогадованє на Михала Рамача

автор Ол. Живкович
777 Опатрене

РУСКИ КЕРЕСТУР – После вечаршей Служби Божей. 28. мая у Виронаучней сали на 20 годзин отримане здогадованє на нєдавно упокоєного Михала Рамача и його духовну животну драгу.

На здогадованю були присутни члени його фамелиї, а парох керестурски о. Владислав Варґа, Микола Шанта, Михайло Фейди и Вадимир Надь Ачим здогадли ше Михаловей улоги у їх животох.

О духовней димензиї Рамача, о. Варґа прекрашнє бешедовал, малююци портрет духовней особи котра у своїх глїбинох преживйовала шицки почежкосци котри го знаходзели през живот. Михайло Фейди ше зоз Рамачом стретнул под час їх заєднїцкого пребуваня у Риме, а Микола Шанта приказал Рамача як колеґу и творчу литературну особу: новинара котри знал препознац вредносц чловека, алє и потреби нашого народу кед порушали виходзенє християнского часописа „Дзвониˮ. Владимир Надь ше здогаднул стретнуца з Рамачом под час свойого студираня у України и през роботу на заєднїцких драмских проєктох.

Здогадованє прикрашела Женска шпивацка ґрупа Дома култури Руски Керестур под фахову руку Еуфемиї Планкош, котра одшпивала два шпиванки на Костельниково стихи. Младежеска шпивцка ґрупа учасц вжала тиж зоз двома композициями. Стихи Михала Рамача рецитовали Владимир Надь Ачим, Ема Живкович и Оленка Живкович. Конферасу написала Мария Стрибер, а читала ю О. Живкович.

ПОВЯЗАНИ ТЕКСТИ