РУСКИ КЕРЕСТУР – Уж дванасти рок Здруженє паприґарох „Капсикум анум” орґанизує Жимску школу за шицких заинтересованих, нє лєм за своїх членох. Школа ше орґанизує з цильом превозиходзеня проблемох у заградкарскей и польодїлскей продукциї, запровадзованя иновацийох и звладованя нєпредвидлївих ситуацийох до котрих приходзи каждей сезони, насампредз паприґарскей продукциї котра основна дїялносц велїм у валалє.
На початку презентациї, спред Здруженя паприґарох Душица Орос привитала присутних и замодлєлa их най ше шлєбодно oпитаю шицко цо их интересує, най подзеля свойо искуства и проблеми з котрима ше стретаю у продукциї. Оросова гварела же на тих презентацийох до фокусу положа паприґу же би ше злєпшало способ продукциї и нашло ришеня за проблеми з котрима ше стретаю керестурски паприґаре.
Керестурски парасти буду мац нагоду же би пред початком ярнєй шатви одлучели котри файти гибридних нашеньох буду хасновац тей сезони, як и з котрима средствами буду знїщовац коровача и за котри инсектициди и фунґициди ше опредзеля.
На презентациї, свойо продукти и искуства представели компаниї „Савакоп” (Savacoop), „Бациломикс” (Bacilomix), и „Аґробиохем” (Agrobiohem), шицки три компаниї зоз Нового Саду.