И Русиново фодбалере страцели у госцох

автор а. медєши
215 Опатрене

КЛЯЇЧЕВО/РУСКИ КЕРЕСТУР – У 26. колу Подручней фодбалскей лиґи Зомбор, фодбалере Русину у Кляїчеве поражени од домашнєй екипи Кордун з минималним резултатом 1:0 (1:0).

Внєдзелю, 15. мая у Кляїчеве, домашнї почали водзиц у 23. минути после єдиней гришки у охрани, же би после датого ґолу по конєц змаганя анї раз озбильнєйше нє загрожели Русинов ґол. После достатого ґолу, Русин пребера бависко, вецей ше бави на часци терена домашнїх, и у тим случаю без правей нагоди за ґол.

Домашнї бавяче як кед би ше задоволєли зоз єдним ґолом, а госци тиж без озбильнєйшей мотивациї виєдначиц резултат.

У 68. минути сиґурни у охрани, Андрей Малацко, прави други жовти картон цо– червени, та по конєц змаганя Русин бави без єдного бавяча.

За Русин, на тим змаганю, наступали аж штирме бавяче зоз Русинового подростку.

Русин наступел у составе – Кронич, Тома С., Чернок, Вуйович, Малацко, Павлович, Ланчужанин, Кулич Н., Кулич Я., Сушич, Чонка, а зоз резерви – Зорич, Тома А., Бранкович.

По конєц першенства остало ище штири кола, та Русин чека Будучносц зоз Параґох и Полет Каравуково, а до госцох идзе Будучносци до Ґложану и Радничкому до Зомбору.

Уж на нєдзелю змаганє процив Будучносци зоз Параґох бави ше на Ярашу од 15 годзин.

ПОВЯЗАНИ ТЕКСТИ