Од Берлину по Рио

автор апал 25. юлий 2016

Того року наполнї ше 110 роки од народзеня Йоакима Яши Бакова. Народзени є 10. децембра 1906. року у Дюрдьове. Бул чловек хтори у себе мал нєвичерпни потенцияли по хторих го паметаю шицки дзе жил и робел. Насампредз го паметаме по вельким доприношеню у роботи з младима, усадзованю спортского духу, окреме у атлетики. После тельо роки, чи случайно, чи нє, у швеце атлетики ознова маме спортистох хтори инфицировани з любову ґу атлетики посцигую позарядово резултати на домашнїх и шветових атлетских аренох.

ОД БЕРЛИНУ ПО РИО

Основну школу Яша Баков закончел у Дюрдьове, до ґимназиї ходзел у Зренянину и Новим Садзе. Бул одлични школяр. Перше уписал теолоґийни факултет, и Риме, алє пошвидко ше врацел до Беоґраду на Филозофски факултет, дзе ше уписал на ґрупу югославянска литература, сербскогорватски и французки язик. Дипломовал 1934. року. На початку службовал у Славонскей Пожеґи, Копривници, а по Другей шветовей войни поставени є за професора у Нїзшей мишаней ґимназиї у Руским Керестуре. Од 1949. року кариєру предлужел як атлетски тренер у Новим Садзе, цо му було жаданє. Потим го спорт одведол до Сараєва, дзе препровадзел свойо найплоднєйши роки. Од 1956. року робел у Панчеве и Беоґрадзе, а потим ше врацел до Нового Саду, дзе 1971. року пошол до заслуженей пензиї.

Зоз спортом ше почал занїмац од дзецинства. Кед мал петнац роки, у Дюрдьове основал спортски клуб (атлетика, фодбал) хтори ше волал “Дяк”. Перши раз, кед мал осемнац роки, участвовал на атлетским змаганю. Було то ґимназийске першенство 1924. року у Зренянину. Перше значнєйше припознанє достал на югославянским злєту у Любляни 1932. року, дзе у атлетским дзешецбою освоєл перше место. На змаганю у Удинох 1935. року звекшал югославянски рекорд у дисциплини скок зоз палїцу, кед лату прескочел на висини 3,60 метери. Идуцого, 1936. року, участвовал на Олимпияди хтора отримана у Берлину. На тим змаганю злєпшал державни рекорд у скаканю зоз палїцу зоз прескочену висину од 3,70 метери.

Умар 23. октобра 1974. року и поховани є у Новим Садзе. То скрацени животопис професора и тренера Яши Бакова.

ОСЕМДЗЕШАТ РОКИ ПОЗНЄЙШЕ

Од Олимпияди у Берлину, по нєшка прешло осемдзешат роки. Знова маме атлетичарох за приклад. Безсумнїву, Руски Керестур, дзе Яша Баков бул професор, нєшка прави розсаднїк добрих атлетичарох хтори обецую добри резултати.

Нє було змаганя, на хторим участвовали керестурски атлетичаре, а же нє призначели вельки успих. Здогаднїме ше даскелїх успихох.

Антония Монар и Иван Будински з Руского Керестура, на числених змаганьох на хторих участвовали достали вельо награди и припознаня. Прешлого року, як побиднїки на Републичним змаганю у атлетики достали похвалнїци и пригодни дарунки. Награди  им уручела Драґица Николич, предсидателька Управного одбору Фондациї „Драґица Николич”.

atletika 29

Антония Монар награду достала за освоєне перше место у скаканю до висока на Републичним (державним) першенстве за школярох основних школох у атлетики. Перше место освоєла з прескочену висину 1,52 метери. Иван Будински наградзени за освоєне перше место на истим змаганю, алє у руцаню кулї, хтору теди руцел 14,70 метери.

На Першенстве Сербиї за младших пионирох хторе отримане у Новим Садзе прешлого року, млада атлетичарка керестурского Русинa Кристина Катонаосвоєла златну медалю у скаканю до висока. Кристина (народзена 2002. року) лату прескочела на 1,46 метери, цо єй нови особни рекорд, злєпшани за 5 центиметри.

Атлетичар Дарян Белак з Руского Керестура, у дружтве вельких атлетичарох достава свойо место. Уж роками ше обегує на змаганьох, а єден з успишних було обегованє кед зважал перше место на тисяч метери за штредньошколцох на 23. Новосадским маратону, хтори отримани концом прешлого року.

Белак на Маратону представял свою штредню Транспортну школу „Пинки” з Нового Саду, дзе тераз и тренира у Атлетским клубу “Войводина”.

РУСНАК, АТЛЕТИЧАР НА ОЛИМПИЯДИ У РИУ

Нєшка, после тельо рокох, нєт Руснака хтори ше нє цеши зоз успихом хтори посцигнул наш дзешецбоєц Михаил Дудаш. Зоз посцигнутим резултатом на змаганю у Новим Садзе, сполнєл норму за одход на Олимпияду до Бразилу. Алє, то нє шицко. На Европским атлетским першенстве хторе отримане у Амстердаму, свою кандидатуру потвердзел зоз освойованьом бронзовей медалї у дзешецбою.

У возбудлївим змаганю дзешецбойцох, у Амстердаму, у остатнєй дисциплини – бежанє на 1 500 метери, Михаил витворел найлєпши резултат у сезони. Дражку пребегнул за 4 минути, 30 секунди и 90 стотинки. Зоз тим резултатом завжал осме место у тей дисциплини, а за друге место (стриберну медалю) хибели му у ґенералним пласману лєм штири боди. З дзешец дисциплинох на тим змаганю освоєл 8 152 боди.

Dudas 29 1На тим змаганю Михаил Дудаш на сто метери бежал 10,90 секунди,  до далєка скочел 7,44 метери, кулю руцел 14,24 метери (особни рекорд), до висока скочел 2,01 метер (рекорд Сербиї), 400 метери бежал за 49,45 секунди, у обегованю на 110 метери зоз препреченями бежал 14,55 секунди, диск руцел 45,65 метери, з палїцу лату прескочел на висини 4,70 метери, копию руцел 58,19 метери, а у обегованю на 1 500 метери зазначел рекорд Сербиї зоз часом 4 минути, 30 секунди и 90 стотинки. Зоз тима резултатами освоєл треце место у ґенералним пласману. Перше место освоєл репрезентативец Белґиї Томас ван ден Плетсен, а други бул Чех Адам Хелцелет.

З оглядом же скоро у шицких дисциплинох през рок призначовал и лєпши резултати, мож очековац же наш Михаил повтори успих зоз Европского першенства. Самодовириє здобул, а потримовку ма од нас шицких.

МИХАИЛОВО НАЙЛЄПШИ РЕЗУЛТАТИ

Вельки змаганя на спортистох вплївую и позитивно и неґативно. Треба окрем схопносци мац и психичну стабилносц хтора обезпечує добри резултати. Спрам по тераз посцигнутих резултатох од Михаила можеме очековац добри резултат и на Олимпияди.

Його найлєпши резултати хтори по тераз призначел випатраю так: 100 метери бежал за 10,67 секунди, до далєка скочел 7,63 метери, у завартим кулю руцал 14,38 метери, до висока скакал, тиж у завартим, 2,08 метери, 400 метери бежал за 47,47 секунди, 110 метери зоз препреченями бежал 14,52 секунди, диск руцел 47,34 метери, зоз палїцу лату прескочел на 4,90 метери, копию руцел 62 метери, а 1 500 метери бежал 4 минути, 24 секунди и 30 стотинки.

(Опатрене 137 раз, нєшка 1)