КУЛА – На вчерайшим Сайме за обезпечованє роботи у Кули найвекше интересованє було при штанду италиянскей компаниї за продукцию споднїх шматох „Фиорано” д.о.о. Зомбор, хтора глєдала аж 200 роботнїкох за свой будуци погон хтори би мал буц отворени у Индустрийней зони у Кули, а примали роботни прияви за шивачки, орґанизаторох продукциї и механїчарох.
– „Фиорано” озбильна компания, на далєко позната по квалитету своєй роботи, алє и по коректних одношеньох ґу роботнїком. Глєдаю роботнїкох за будуци погон, а предпоставям же вельке число роботних местох буду роздзелєни праве ту, на Сайме. Можем повесц же и тераз у їх продукциї у Зомборе робя велї з кулскей општини, медзи нїма и зоз VII ступньом образованя, котри там задовольни и можу напредовац – гварела за Рутенпрес портпаролка кулскей филияли Националней служби за обезпечованє роботи (НСЗ) Ґордана Предоєвич.
Саям обезпечованя роботи вчера отримани у сали Мадярского културного центру „Непкер” у Кули, а роботу понукали 14 роботодавателє за коло 300 роботни места розличних профилох и образовних ступньох – за вожачох, будовательних роботнїкох, шивачки, автомеханїчарох, правнїкох, лаборантох, технолоґох, комерциялистох, совитнїкох за осиґуранє, економистох и др.
Роботу понукала и рускокерестурска фабрика „АБЦ ФУД” АД за вецей роботни места – технолоґох, лаборантох, комерциялистох, електричарох, шлосерох, котларох, видлїчкаристох и компресористох.
– „АБЦ ФУД” озбильне подприємство, та глєдаме и таких роботнїкох. Пробней роботи нєт, алє прето перши контракт подписуєме на кратши период. Думам же нєзанятим вредзи пробовац робиц у нас – гварела представителька Хладзальнї котра примала роботни прияви.
Одход нєзанятих на Саям зоз шицких местох у кулскей општини безплатно, з белавим евиденцийним картоном, бул орґанизовани на порядних автобусних линийох, а Саям орґанизовало кулске оддзелєнє зомборскей филияли НСЗ, у сотруднїцтве з локалну самоуправу.