НОВИ САД – Кандидат за предсидателя Сербиї Александар Вучич всоботу, 18. марца, отримал вельки предвиберанкови митинг на Площи шлєбоди у Новим Садзе, на хторим присуствовало вельке число його прихилнїкох з Войводини, алє и з рижних местох у Сербиї.
Представяюци свою програму Вучич поручел же потребна ище лєм єдна виберанкова побида, же бизме жили у пристойней и напредней Сербиї.
– Держава пребарз важна же бизме ю знова препущели гевтим котри ю окрадли – гварел Вучич и прекоментаровал же на гласацким лїстку 2. априла будзе дзешец кандидатох процив нього єдного, а гражданє на виберанкох укажу кого Сербия волї.
На предвиверанковим митингу Александра Вучича бешедовали и його коалицийни партнере – лидере Социялистичней партиї Сербиї Ивица Дачич и Союзу войводянских Мадярох Иштван Пастор, як и водзаци члени Сербскей напредней странки – предсидателька Народней скупштини Републики Сербиї Мая Ґойкович, предсидатель Покраїнскей влади Игор Мирович и городоначалнїк Нового Саду Милош Вучевич.