РУСКИ КЕРЕСТУР – Внєдзелю пред рускокерестурску публику други раз одбавена дзецинска представа „Цифровани яблука” Ивани Деспотович по мотивох приповедки „Яблуко” Драґана Лукича, у режиї Ксениї Бодянец, а котру пририхтала дзецинска ґрупа Драмского студия „Арт”.
За осемнацчлени ґлумецки ансамбл тото дїло перше сценске анґажованє, а у новей ґенерациї керестурских наймладших ґлумцох од першей по штварту класу наступели Емина Бики, Андреа Надь, Алексей Роман, Дарио Кишюгас, Яна Варґа, Филип Илич, Емина Няради, Филип Ноґо, Сташа Малинович, Юлияна Бодянєц, Матея Папуґа, Анита Чизмар, Ана Ґовля, Ема Живкович, Мартина Еделински, Сара Боцка, Патрик Варґа и Аня Симич.
Нєдзельове виводзенє ґлумцом було лєгчейше, цо могло обачиц по опущеншей атмосфери и шмелших наступох. Представа гутори о безконєчней моци природних силох, як цо то витор котри з причину прави шора, покля ше нє запровадзи доброта. У приповедки штири яблука котри роздул витор глєдаю найлєпши особи котри би их требали поєсц, бо сон каждого яблука же би го поєдла добра особа. Преплєтаю ше ту и подоби зоз дзецинских сказкох, алє яблука поєдли брацик и шестричка зоз реалного швета.
Текст представи преложел Владимир Бодянец, суфлерки и инспициєнтки були Марина Надь и Ивана Планчак, костимоґраф Таня Орос, музични сотруднїк и тон-майстор Михайло Бодянец, майстор шветла Сашо Палєнкаш, виробок маскох Тияна Бандич Сопка, а сценски майстор Мирон Хрин.